ਨਵੀਂ ਦਿੱਲੀ, 12 ਜੂਨ
ਜੀਐੱਸਟੀ ਕੌਂਸਲ ਨੇ ਕੋਵਿਡ-19 ਦੀਆਂ ਦਵਾਈਆਂ ਜਿਵੇਂ ਕਿ ਰੈਮਡੇਸਿਵਿਰ ਤੇ ਹੋਰ ਉਪਕਰਨਾਂ- ਆਕਸੀਜਨ ਕੰਸਨਟਰੇਟਰਾਂ ਤੇ ਮੈਡੀਕਲ ਗਰੇਡ ਆਕਸੀਜਨ ਤੋਂ ਟੈਕਸ ਦਰ ਘਟਾ ਦਿੱਤੀ ਹੈ। ਟੋਸਿਲਿਜੁਮੈਬ ਟੀਕੇ ਤੇ ਐਮਫੋਟੈਰੀਸਿਨ ਬੀ ਉਤੇ ਹੁਣ ਕੋਈ ਜੀਐੱਸਟੀ ਨਹੀਂ ਲੱਗੇਗਾ ਜਦਕਿ ਪਹਿਲਾਂ ਪੰਜ ਪ੍ਰਤੀਸ਼ਤ ਟੈਕਸ ਲੱਗ ਰਿਹਾ ਸੀ। ਇਸੇ ਤਰ੍ਹਾਂ ਰੈਮਡੇਸਿਵਿਰ ਤੇ ਹੇਪਰਿਨ ਉਤੇ ਟੈਕਸ ਦਰ ਵੀ 12 ਫੀਸਦ ਤੋਂ ਘਟਾ ਕੇ ਪੰਜ ਫੀਸਦ ਕਰ ਦਿੱਤੀ ਗਈ ਹੈ। ਮੈਡੀਕਲ ਗਰੇਡ ਆਕਸੀਜਨ, ਆਕਸੀਜਨ ਕੰਸਨਟਰੇਟਰਾਂ, ਵੈਂਟੀਲੇਟਰਾਂ, ਬਾਇਪੈਪ ਮਸ਼ੀਨਾਂ ਤੇ ਨੇਜ਼ਲ ਕੈਨੁਲਾ (ਐਚਐਫਐਨਸੀ) ਉਪਕਰਨਾਂ ’ਤੇ ਵੀ ਟੈਕਸ ਦਰ ਘਟ ਕੇ ਪੰਜ ਪ੍ਰਤੀਸ਼ਤ ਰਹਿ ਗਈ ਹੈ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਾਮਨ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਕੋਵਿਡ ਟੈਸਟਿੰਗ ਕਿੱਟ ਉਤੇ ਟੈਕਸ 12 ਤੋਂ ਘੱਟ ਕੇ ਪੰਜ ਪ੍ਰਤੀਸ਼ਤ ਰਹਿ ਗਿਆ ਹੈ। ਪਲਸ ਆਕਸੀਮੀਟਰ, ਹੈਂਡ ਸੈਨੇਟਾਈਜ਼ਰ, ਤਾਪਮਾਨ ਮਾਪਣ ਵਾਲੇ ਉਪਕਰਨਾਂ ਤੇ ਐਂਬੂਲੈਂਸਾਂ ਉਤੇ ਵੀ ਟੈਕਸ ਪੰਜ ਪ੍ਰਤੀਸ਼ਤ ਹੀ ਲੱਗੇਗਾ। ਕੌਂਸਲ ਨੇ ਵੱਖ-ਵੱਖ ਰਾਜਾਂ ਦੇ ਮੰਤਰੀਆਂ ਦੇ ਗਰੁੱਪ ਦੀਆਂ ਸਿਫਾਰਿਸ਼ਾਂ ਉਤੇ ਅਮਲ ਕਰਦਿਆਂ ਇਹ ਫ਼ੈਸਲਾ ਲਿਆ ਹੈ। ਕੋਵਿਡ ਵੈਕਸੀਨ ਉਤੇ ਜੀਐੱਸਟੀ ਹਾਲਾਂਕਿ ਪੰਜ ਫੀਸਦ ਹੀ ਰਹੇਗਾ ਕਿਉਂਕਿ ਕੌਂਸਲ ਮੁਤਾਬਕ ਜ਼ਿਆਦਾਤਰ ਵੈਕਸੀਨ ਕੇਂਦਰ ਸਰਕਾਰ ਖ਼ਰੀਦ ਕੇ ਲੋਕਾਂ ਨੂੰ ਮੁਫ਼ਤ ਵਿਚ ਦੇ ਰਹੀ ਹੈ। ਘਟਾਏ ਗਏ ਜੀਐੱਸਟੀ ਬਾਰੇ ਨੋਟੀਫਿਕੇਸ਼ਨ ਸਰਕਾਰ ਇਕ-ਦੋ ਦਿਨ ਵਿਚ ਜਾਰੀ ਕਰੇਗੀ। ਕਰੀਬ 18 ਵਸਤਾਂ ਹਨ ਜਿਨ੍ਹਾਂ ’ਤੇ ਜੀਐੱਸਟੀ ਘਟਾਇਆ ਗਿਆ ਹੈ। ਘਟਾਈਆਂ ਗਈਆਂ ਦਰਾਂ ਜਿਸ ਮੰਤਰੀ ਸਮੂਹ ਦੀਆਂ ਸਿਫਾਰਿਸ਼ਾਂ ਉਤੇ ਅਧਾਰਿਤ ਹਨ ਉਸ ਦੀ ਅਗਵਾਈ ਮੇਘਾਲਿਆ ਦੇ ਉਪ ਮੁੱਖ ਮੰਤਰੀ ਕੋਨਰਾਡ ਸੰਗਮਾ ਕਰ ਰਹੇ ਸਨ। ਟੈਕਸ ਬਾਰੇ ਜਾਰੀ ਹਦਾਇਤਾਂ 30 ਸਤੰਬਰ ਤੱਕ ਲਾਗੂ ਰਹਿਣਗੀਆਂ। ਕੌਂਸਲ ਦੀ 44ਵੀਂ ਬੈਠਕ ਦੌਰਾਨ ਵਿੱਤ ਮੰਤਰੀ ਨੇ ਕਿਹਾ ਕਿ ਕੇਂਦਰ ਸਰਕਾਰ 75 ਪ੍ਰਤੀਸ਼ਤ ਵੈਕਸੀਨ ਖ਼ਰੀਦ ਰਹੀ ਹੈ ਤੇ ਜੀਐੱਸਟੀ ਵੀ ਦੇ ਰਹੀ ਹੈ। ਪਰ ਲੋਕਾਂ ਉਤੇ ਇਸ ਜੀਐੱਸਟੀ ਦਾ ਕੋਈ ਬੋਝ ਨਹੀਂ ਹੋਵੇਗਾ ਕਿਉਂਕਿ ਲੋਕਾਂ ਨੂੰ ਸਰਕਾਰੀ ਹਸਪਤਾਲਾਂ ਵਿਚ ਵੈਕਸੀਨ ਮੁਫ਼ਤ ਮਿਲੇਗਾ। ਇਸ ਮੌਕੇ ਕੇਂਦਰ ਸਰਕਾਰ ਦੇ ਰੈਵੇਨਿਊ ਸਕੱਤਰ ਤਰੁਣ ਬਜਾਜ ਵੀ ਮੌਜੂਦ ਸਨ। ਗੈਸ/ਇਲੈਕਟ੍ਰਿਕ ਸ਼ਮਸ਼ਾਨਘਾਟਾਂ ਦੀਆਂ ਭੱਠੀਆਂ ਖ਼ਰੀਦਣ ਉਤੇ ਵੀ ਹੁਣ ਪੰਜ ਪ੍ਰਤੀਸ਼ਤ ਟੈਕਸ ਹੀ ਲੱਗੇਗਾ। ਇਹ ਪਹਿਲਾਂ 18 ਫੀਸਦ ਸੀ। ਜ਼ਿਕਰਯੋਗ ਹੈ ਕਿ ਕੌਂਸਲ ਦੀ ਪਿਛਲੀ ਮੀਟਿੰਗ 28 ਮਈ ਨੂੰ ਹੋਈ ਸੀ ਤੇ ਉਸ ਵੇਲੇ ਕੋਈ ਤਬਦੀਲੀ ਨਹੀਂ ਐਲਾਨੀ ਗਈ ਸੀ। ਇਸ ਮਾਮਲੇ ’ਤੇ ਕੇਂਦਰ ਤੇ ਰਾਜਾਂ ਵਿਚਾਲੇ ਖਿੱਚੋਤਾਣ ਬਣੀ ਹੋਈ ਸੀ। -ਪੀਟੀਆਈ
ਜੀਐੱਸਟੀ ਕੌਂਸਲ ਦੇ ਮੰਤਰੀ ਸਮੂਹ ’ਚ ਕਾਂਗਰਸ ਨੂੰ ਵੀ ਥਾਂ ਮਿਲੇ: ਮਨਪ੍ਰੀਤ ਬਾਦਲ
ਚੰਡੀਗੜ੍ਹ (ਟਨਸ): ਪੰਜਾਬ ਦੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਅੱਜ ਕਿਹਾ ਕਿ ਕੋਵਿਡ ਵਰਗਾ ਸੰਕਟ ਕਿਤੇ ਸਦੀ ਵਿਚ ਇਕ ਵਾਰ ਆਉਂਦਾ ਹੈ ਤੇ ਜੀਐੱਸਟੀ ਦੇ ਮੰਤਰੀ ਸਮੂਹ (ਜੀਓਐਮ) ਨੂੰ ਪੁਰਾਣੇ ਸਮਿਆਂ ਦੇ ‘ਸ਼ਹਿਨਸ਼ਾਹ’ ਵਰਗਾ ਨਹੀਂ ਬਣਨਾ ਚਾਹੀਦਾ ਤੇ ਉਨ੍ਹਾਂ ਦੇ ਫ਼ੈਸਲਿਆਂ ਵਿਚੋਂ ਸੰਵੇਦਨਾ ਝਲਕਣੀ ਚਾਹੀਦੀ ਹੈ। ਪੰਜਾਬ ਦੇ ਵਿੱਤ ਮੰਤਰੀ ਨੇ ਦੂਜੇ ਸੂਬਿਆਂ ਦੇ ਕਾਂਗਰਸੀ ਵਿੱਤ ਮੰਤਰੀਆਂ ਨਾਲ ਇਕਸੁਰ ਹੋ ਕੇ ਕੋਵਿਡ ਨਾਲ ਸਬੰਧਤ ਸਮੱਗਰੀ ਉਤੇ ਜੀਐੱਸਟੀ ਵਸੂਲਣ ਦਾ ਵਿਰੋਧ ਕੀਤਾ। ਉਨ੍ਹਾਂ ਕਿਹਾ ਕਿ ਇਕ ਬਦਲ ਵਜੋਂ 0.1 ਪ੍ਰਤੀਸ਼ਤ ਚਾਰਜ ਕੀਤਾ ਜਾ ਸਕਦਾ ਹੈ ਜੋ ਕਿ ਜੀਐੱਸਟੀ ਕੌਂਸਲ ਦੇ ਘੇਰੇ ਵਿਚ ਹੀ ਹੈ। ਉਨ੍ਹਾਂ ਕਿਹਾ ਕਿ ਜਦ ਤੱਕ ਮਹਾਮਾਰੀ ਖ਼ਤਮ ਨਹੀਂ ਹੁੰਦੀ ਇਹ ਫ਼ੈਸਲਾ ਕਾਇਮ ਰੱਖਣਾ ਚਾਹੀਦਾ ਹੈ। ਜੀਐੱਸਟੀ ਕੌਂਸਲ ਦੀ 44ਵੀਂ ਮੀਟਿੰਗ ’ਚ ਵਿੱਤ ਮੰਤਰੀ ਨੇ ਮੰਤਰੀ ਸਮੂਹ ਵਿਚ ਕਾਂਗਰਸ ਦੇ ਨੁਮਾਇੰਦਿਆਂ ਨੂੰ ਸ਼ਾਮਲ ਕਰਨ ਦੀ ਮੰਗ ਕੀਤੀ। ਉਨ੍ਹਾਂ ਕਿਹਾ ਕਿ ਇਹ ਹਾਸੋਹੀਣਾ ਲੱਗਦਾ ਹੈ ਕਿ ਮੰਤਰੀਆਂ ਦੇ ਸਮੂਹ ਵਿਚ ਭਾਰਤ ਦੀ ਮੁੱਖ ਵਿਰੋਧੀ ਧਿਰ ਦਾ ਕੋਈ ਮੈਂਬਰ ਸ਼ਾਮਲ ਨਹੀਂ ਹੈ। ਉਨ੍ਹਾਂ ਨਾਲ ਹੀ ਕੌਂਸਲ ਦਾ ਉਪ ਚੇਅਰਮੈਨ ਲਾਉਣ ਤੇ ਵੱਖਰਾ ਸਕੱਤਰੇਤ ਕਾਇਮ ਕਰਨ ਦੀ ਮੰਗ ਵੀ ਕੀਤੀ। ਬਾਦਲ ਨੇ ਦੋਸ਼ ਲਾਇਆ ਕਿ ਮੰਤਰੀ ਸਮੂਹ ਭਾਰਤ ਸਰਕਾਰ ਦੀ ਬੋਲੀ ਹੀ ਬੋਲ ਰਿਹਾ ਹੈ।
