ਹੈਦਰਾਬਾਦ: ਦੱਖਣੀ ਫਿਲਮਾਂ ਦੇ ਸਟਾਰ ਰਾਮ ਚਰਨ ਨੇ ਅੱਜ ਫਿਲਮਸਾਜ਼ ਐੱਸਐੱਸ ਰਾਜਾਮੌਲੀ ਦੀ ਫਿਲਮ ‘ਰਾਈਜ਼ ਰੋਅਰ ਰਿਵੋਲਟ’ (ਆਰਆਰਆਰ) ਦੀ ਸ਼ੂਟਿੰਗ ਸ਼ੁਰੂ ਕਰ ਦਿੱਤੀ ਹੈ। ਤਿਲੰਗਾਨਾ ਸਰਕਾਰ ਵੱਲੋਂ ਸੂਬੇ ਵਿੱਚੋਂ ਤਾਲਾਬੰਦੀ ਨੂੰ ਹਟਾਉਣ ਦੇ ਫ਼ੈਸਲੇ ਤੋਂ ਇੱਕ ਦਿਨ ਮਗਰੋਂ ਨਿਰਮਾਤਾਵਾਂ ਨੇ ਫਿਲਮਾਂਕਣ ਦੀ ਸ਼ੁਰੂਆਤ ਕੀਤੀ। ਸੈਲੀਬ੍ਰਿਟੀ ਹੇਅਰ ਸਟਾਈਲਿਸਟ ਆਲਿਮ ਹਕੀਮ ਨੇ ਇੰਸਟਾਗ੍ਰਾਮ ’ਤੇ ਰਾਮ ਚਰਨ ਨਾਲ ਇੱਕ ਤਸਵੀਰ ਸਾਂਝੀ ਕੀਤੀ ਹੈ। ਉਸ ਨੇ ਲਿਖਿਆ, ‘ਅੱਜ ਹੈਦਰਾਬਾਦ ਵਿੱਚ, ਲੌਕਡਾਊਨ 2.0 ਹਟਾ ਦਿੱਤਾ ਗਿਆ ਹੈ ਅਤੇ ਫਿਲਮਾਂ ਦੀ ਸ਼ੂਟਿੰਗ ਮੁੜ ਸ਼ੁਰੂ ਹੋ ਗਈ ਹੈ। ਮੇਰੇ ਦਿਨ ਦੀ ਸ਼ੁਰੂਆਤ ਫਿਲਮ ਆਰਆਰਆਰ ਲਈ ਸੁਪਰਸਟਾਰ ਰਾਮ ਚਰਨ ਦਾ ਹੇਅਰਕੱਟ ਕਰ ਕੇ ਹੋਈ ਹੈ।’ ਰਾਮ ਚਰਨ (36) ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ ’ਤੇ ਹਕੀਮ ਦੀ ਪੋਸਟ ਸਾਂਝੀ ਕੀਤੀ ਅਤੇ ਲਿਖਿਆ, ‘ਲੌਕਡਾਊਨ 2.0 ਮਗਰੋਂ ‘ਆਰਆਰਆਰ’ ਦੀ ਸ਼ੁਰੂਆਤ। ਫਿਲਮ ‘ਆਰਆਰਆਰ’ ਵਿੱਚ ਚਰਨ ਦੇ ਨਾਲ ਐੱਨਟੀ ਰਾਮਾ ਰਾਓ ਜੂਨੀਅਰ ਵੀ ਨਜ਼ਰ ਆਉਣਗੇ। ਫਿਲਮ ਵਿੱਚ ਬੌਲੀਵੁੱਡ ਅਦਾਕਾਰ ਅਜੈ ਦੇਵਗਨ ਅਤੇ ਆਲੀਆ ਭੱਟ ਮੁੱਖ ਭੂਮਿਕਾਵਾਂ ਵਿੱਚ ਹਨ। -ਪੀਟੀਆਈ
ਰਣਵੀਰ ਸਿੰਘ ਕੰਮ ’ਤੇ ਪਰਤਿਆ
ਮੁੰਬਈ: ਬੌਲੀਵੁੱਡ ਅਦਾਕਾਰ ਰਣਵੀਰ ਸਿੰਘ ਅੱਜ ਕੰਮ ’ਤੇ ਪਰਤ ਆਇਆ ਹੈ। ਕੋਵਿਡ-19 ਦੀ ਦੂਜੀ ਲਹਿਰ ਤੋਂ ਬਾਅਦ ਸ਼ਹਿਰ ਨੂੰ ਖੋਲ੍ਹਣ ਦੇ ਫ਼ੈਸਲੇ ਮਗਰੋਂ ਉਹ ਇੱਕ ਫਿਲਮ ਦੇ ਸੈੱਟ ’ਤੇ ਪੁੱਜਿਆ। ਉਸ ਦੀਆਂ ਕੁਝ ਤਸਵੀਰਾਂ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ ਵਿੱਚ ਉਸ ਨੇ ਚਿੱਟੇ ਰੰਗ ਦੀ ਟੀ-ਸ਼ਰਟ, ਲਾਲ ਪੈਂਟ ਤੇ ਚਮਕਦਾਰ ਪੀਲੇ ਰੰਗ ਦੀ ਜੈਕੇਟ ਪਹਿਨੀ ਹੋਈ ਹੈ। ਉਸ ਨੇ ਐਨਕਾਂ, ਟੋਪੀ ਅਤੇ ਮਾਸਕ ਹੀ ਪਹਿਨਿਆ ਹੋਇਆ ਹੈ। ਇੱਕ ਸਰੋਤ ਅਨੁਸਾਰ, ‘ਰਣਵੀਰ ਹਰ ਲੌਕਡਾਊਨ ਤੋਂ ਬਾਅਦ ਸ਼ੂਟਿੰਗ ਨੂੰ ਮੁੜ ਸ਼ੁਰੂ ਕਰਨ ਵਾਲੇ ਅਭਿਨੇਤਾਵਾਂ ਵਿੱਚੋਂ ਇੱਕ ਹੈ ਕਿਉਂਕਿ ਉਹ ਮੰਨਦਾ ਹੈ ਕਿ ਸਿਨੇ ਜਗਤ ਨੂੰ ਮੁੜ ਸ਼ੁਰੂ ਕਰਨ ਦੀ ਲੋੜ ਹੈ। ਹੁਣ ਵੀ ਉਹ ਮੁੜ ਕੰਮ ਸ਼ੁਰੂ ਕਰਨ ਵਾਲੇ ਪਹਿਲੇ ਸੁਪਰਸਟਾਰਾਂ ਵਿੱਚੋਂ ਇੱਕ ਹੈ।’ ਰਣਵੀਰ ਕਿਸ ਫਿਲਮ ਦੀ ਸ਼ੂਟਿੰਗ ਕਰ ਰਹੇ ਹਨ, ਇਸ ਸਬੰਧੀ ਵੇਰਵੇ ਅਜੇ ਗੁਪਤ ਰੱਖੇ ਗਏ ਹਨ। ਸੂਤਰਾਂ ਅਨੁਸਾਰ ਉਹ ਇੱਕ ਵੱਡੇ ਪ੍ਰਾਜੈਕਟ ਦੀ ਸ਼ੂਟਿੰਗ ਕਰ ਰਿਹਾ ਸੀ, ਜਿਸ ਨੂੰ ਗੁਪਤ ਰੱਖਿਆ ਗਿਆ ਸੀ। ਇਸ ਦੇ ਵੇਰਵੇ ਜਲਦੀ ਜਨਤਕ ਕਰ ਦਿੱਤੇ ਜਾਣਗੇ। ਅੱਜ ਦੀ ਸ਼ੂਟਿੰਗ ਦੌਰਾਨ ਰਣਵੀਰ ਹਮੇਸ਼ਾਂ ਵਾਂਗ ਉਤਸ਼ਾਹਿਤ ਨਜ਼ਰ ਆਇਆ। ਦੱਸਣਯੋਗ ਹੈ ਕਿ ਰਣਵੀਰ ਦੀਆਂ ਕਈ ਫਿਲਮਾਂ ਰਿਲੀਜ਼ ਲਈ ਤਿਆਰ ਹਨ। -ਆਈਏਐੱਨਐੱਸ
